Halo-Halo Bandung
Halo-halo Bandung!
Asa bungah kacida manggihan deui hujan salila panas ngabelentrang jiga nu lain di Bandung, cenah mah Bandung teh syahdu, loba kenangan, loba tempat anu estetik, kahalangan ku hiji imah geus manggihan tempat ngopi. Komo Bandung keur hujan mah cenah ngeunaheun jang galau. Ari urang mah Bandung keur hujan sok marudal euy solokan hareupeun jalan imah urang.
Halo-halo Bandung!
Meren jelema nu ngomong Bandung syahdu jeung estetik teh can pernah ngarasaan datang ka Cicaheum tuluy ka Cibiru mengkol saeutik ka Cinunuk sanggeus bunderan.
Tah coba cicing pas keur hujan di dinya, atawa keur panas ngabelentrang, meren boro raah hayang apdet status nya, da kalah rudet nu aya.
Atawa can nyobaan ka Rancamanyar, meren bakal jadi ahli zikir, kulantaran sering istigfar.
Halo-halo Bandung!
Cenah mah kota wisata, tapi jang wargana mah euweuh transportasi publik nu merenah. Naek angkot ti Dago ka Soekarno Hatta sok sering diturunkeun di tengah jalan, “Wios Neng, marebu weh!” Mun geus kitu urang rek naek ojol kagok da mahal, rek leumpang da jantung sehat bitis bucat, rek nungguan angkot kaburu kolot di jalan. Tungtungna mah peuting di jalan weh jaba di Bandung teh keur usum begal. (Mang Presiden tulungan euy, Mang! ☹ )
Halo-halo Bandung!
Urang ayeuna mah teu boga walikota eung, ditewak pulisi aingah meni asa era kacida, cenah kota estetik, kota syahdu, kota seribu kenangan, diciptakan saat Tuhan sedang tersenyum, tapi naha urang mah era nya, walikota ge meni teu boga.
Si Mang Angkot ge osok aambekan da euweuh penumpang, angkotna jiga nu diculkeun weh teu diarurus pamarentah, penumpangna ge jadi hoream da osok diturunkeun padahal can nepi, jadina matak rarudet di jalan.
Halo-halo Bandung!
Komo kamari mah keur usum runtah di mana-mana, rek nyebrang ge hese da jol taman jalanan jeung trotoar teh jadi TPS, ibu-ibu anu rek ka pasar lung weh miceun runtah di mana wae.
Halo-halo Bandung!
Ayeuna mah ning aya beus anu mayarna cashless ngan lima rebu. Alhamdulillah urang meni asa kabantuan mun ek indit jauh. Mun bisa mah eta teh jurusanna dilobaan ngarah teu macet, Mang euy! soalna urang ti Dago ka Jatinangor make beus bisa dua jam, tah sarua jiga ti Dago ka Ciwalk ge piraku sarua dua jam mun poe saptu minggu. Cik atuh euy da urang teh bisa meren sabari masak emih jeung sakalian gegeroh ai kitu mah. Jalan sempit tapi dua jalur, angkot nungguanna lila, kudu muter heula kotka penumpangna tarurun di jalan. Make motor ge sarua weh lila, ngan bisa rada gancang lamun seseleket. Apal sorangan meren di Bandung mah seseleket teh heg nubruk barisan tukang cilor jeung cuanki nu keur naragog.
Halo-halo Bandung!
Urang kamari babaraha poe teu di Bandung ge meni asa sono kana hawana, kumaha henteu sok, di Bandung mah sapanas panasna ge masih keneh ngeunaheun make jeket jiga aa aa wibu geningan, make masker ge teu eungap, tukang tahu bulat ngaliwat babaraha jam sakali, komo cuanki mah jam 7 ge geus nagog di lapangan olahraga, loba deuih lapangan olahragana teh, ngan tukang parkirna hungkul, Mang euy! Jiga ninja jol bijil sorangan gigireun tukang bubur atawa jol aya tukangeun motor, pan reuwas. Dibere dua rebu kadang sok hayang tilu rebu, dibere marebu da bisi euweuh angsulan, ah meni sok jadi hoream.
Tapi di tiap gang aya anu dagang seblak karesep adi urang jeung ayeuna mah loba nu dagang tha thai tea-an tiap leumpang saeutik ge sok manggihan.
Halo-halo Bandung!
Mun urang nanyakeun ka ibu-ibu, “Bu, pami bumi Pak Nandang palih mana?”
Naha ngajawabna teh, “Caket neng, eta di dinya! Mapah sakedik!” padahal mah mapah sakedik teh aya kanu satengah jam.
Tuluy ceuk baturan urang nu lain urang Bandung ambekna si mamah naha bodor,
“Teh, eta lampu pareuman! Pabalap-balap jeung matahari meni caraang kieu!”
Padahal mah ceuk urang teh asa lampu mah cicing teu lulumpatan, naha make paribasa pabalap-balap. Bororaah bodor, urang mah geus weh nurut mareuman lampu da bisi beuki diambekan ku si mamah.
Atawa mun baturan urang titah meuli ka warung beurang-beurang keur halodo tarik, ngomongna teh,
“Embung ah, moe korong wayah kieu mah!”
Padahal urang mah ngadengena kesel, tapi baturan urang nu lain urang Bandung kalah seuseurian.
Halo-halo Bandung!
Naha ayeuna jadi loba teteh-teteh anu ditiung tapi si beuheungna teh katingali, atawa teteh-teteh anu ditiung ngararoko elektrik tea ning, baheula asa can pernah manggihan nu karitu. Sok sarieun, Mang euy!
Halo-halo Bandung!
Lamun heug hiji waktu urang kudu indit teu di dieu deui, urang cik hayang dimakamkeun di dieu nya. Hayang balik deui da sanajan loba tapina, Bandung mah dihampura ku urang, kalem!
2024, semoga Bandung lebih baik.
SNA
Bandung, 5 Januari 2024
